RENE HERDÉ ASOMBRA CON ALGUN GOBERNANTE TA GOLOS PA COS


ORANJESTAD (AAN): Segun Rene Herdé, kende ta ex-Parlamentario di AVP, e ta sorprendi con algun gobernante tin asina “golos pa cos”, enbez di sirbishi publico sin interes propio.

Segun Herdé, e decision di e minister di Infrastructura pa duna un di e boulevardnan principal di nos isla e nomber di un ex-prome minister mientras cu e ta na bida y obviamente activo y contraversial den politica ainda, a lanta hopi discucion den comunidad.

E decision a haya hopi, pero hopi desaprobacion pa e “mal smaak”, e forma autoritario y e momento inoportuno cu a scohe pa haci e nombracion aki (=na momento cu ta finalisa e Watty Vos Boulevard cu ta bay bira un di e adernan di trafico mas bunita y principal di nos isla.)

E decision a lanta algun otro tema di discucion importante cerca hoben y grandi den comunidad. Entre e temanan aki ta resalta e pregunta si e partido(nan) den gobierno, na cua momento cu ta, tin sin mas e autoridad legal y ethico pa dicidi sin niun consulta y sin niun otro considerasion, pa co’i un caya, un plaza, un scol, un edicifio publico, un parke of un tereno di deporte y pone nomber di nan amigonan politico riba dje….. y spera cu resto di comunidad ta djies guli’e!

E reaccionnan riba e decision pa cambia e nomber di e boulevard importante aki y pone nomber di e ex-prome minister y ex-lider di MEP, ta mustra cu mester bini cambio den esaki. Pa respet pa henter nos pais, mester depolitisa e dunamento di nomber na lugarnan publico y introduci un forma mas racional, cu bon criterio y cu comunidad ta accepta y reconoce como corecto.

Un di dos discusion cu a surgi ta e pregunta si hende ta drenta politica pa haya cos. Haya posicion? Haya poder y placa? Haya reconocemento? E punto di bista den comunidad cu mas ta prevalece ta, cu traha den gobierno y ainda mas, traha como politico, ta pa sirbi pais y pueblo! Sin interes personal! Sirbishi publico no ta pa haya cos.

Ni posicion, ni poder, ni reconocemento!!! Lamentablemente e comportacion di cierto partidonan politico, en particular e partido MEP, ta caracterisa pa nepotismo, sed pa poder y control, y hamber pa reconocemento comosifuera ta nan so ta traha pa Aruba. E nombramento di famia di politiconan den posicionnan den gobierno y empresanan publico, sin tene considerasion cu por tin otro hende miho cualifica, a duna MEP e fama di partido di famia y amigo (“friends and family”/nepotismo) pa decadanan caba.

Cu tur e no bramento di famia, famia y mas famia den e gobierno existente, nan a mustra cu nada no a cambia den MEP. Lamentablemente e otro partidonan di coalicion a sigui e mal ehempel aki! Cu e nombramento di famia y amigonan MEP (y awor tambe POR y RED) a mustra cu na interes ta pa uza placa di pueblo pa paga famia y amigonan politico!

Cu e nombracionnan politico aki tambe nan a mustra e deseo pa controla henter aparato publico y domina tur conseho, formacion di pensamento y decision, cu pensamento y interesnan partidista! E sed pa poder y control absoluto! (Pone acerca cu riba niun tereno tin dialogo habri cu gremionan den comunidad pa sikiera scucha loke comunidad ta pensa!) Nada di sirbishi na comunidad! E unico meta ta pa gara mas poder posibel!

Si e meta ta pa sirbi sin interes propio, niun politico mester ni spera reconocemento! Menos aun traha pa haya of duna reconocemento na amigonan politico mientras cu e nan ta na bida.

Awor, niun hende ta ni duda cu e reconocemento di Padu Lampe, Rufo Wever y Lio Booi cu e plaza Padu tras di oficina principal di gobierno, ta completamente na su luga. Nan ta baluartenan nacional cu a sirbi nos pais di berdad sin niun interes personal! Pero pa honra amigonan politico controversial na bida cu nombracion di un area publico asina importante, obviamente ta trece un smaak malo cun’e.

Sikiera por sondea den comunidad pa tende kico comunidad ta pensa, manera a haci den mas cu un caso den pasado. Si kier rindi honor y mustra gratitud na personanan activo y controversial manera e ex-prome minister Nelson Oduber, anto por a haci’e den seno di propio partido, den cede di partido….

Laga pa generacionnan den futuro wak henter e bida di un hende, considera otro posibilidadnan y didicidi si ta duna un reconocemento. Pero e gana di cos, di posicion, poder y reconocemento, manera den e caso aki, ta mustra cu MEP, POR y RED ta sigui “golos pa cos, enbez di sirbishi sin interes na comunidad”. Read more

UN TRAYECTORIA DI 50 AÑA COMO DOCENTE CU UN HISTORIA DI ESTUDIO, TRABAO Y EXITO SU TRAS


Ramon Todd Dandaré:

ORANJESTAD (AAN) – Drs. Ramon Todd Dandaré, den entrevista cu Matutino DIARIO tocante su di 50 aña como docente, a menciona cu e tempo cu el a studia na Colegio Arubano, e sistema tabata diferente. E tempo ey no tabata tin HAVO ni VWO sino HBS cu tabata nifica “Hoger Burger School”, kiermen un scol di elite.

Ramon a keda sinta den derde klas di HBS-B cu ta encera matematica, Quimica, Fisica, Biologia, etc. Como cu e no kier a bay Colegio mas, el a bolbe Dominicus College, unda el a caba su MULO-B y a dicidi di bay Hulanda riba su propio forza.

Na prome instancia su intencion tabata pa bay biba na Eindhoven pero den e ciudad aki e no a haya trabao, no obstante a cuminza traha na Amsterdam.

“Tempo cu mi a bay mi tabata tin caba e pensamento cu mi ta bay studia Spaño. Y ta asina cu na Eindhoven hasta sin a haya trabao ya mi a cuminza bay na Gymnasium cu ta otro tipo di scol secundario. Gymnasium su specialidad ta cu e ta un estudio den lenganan clasico. Kiermen, bo ta haya Latin y Griego, locual pa mi tabata un bon base pa sigui studia Spaño. Finalmente, mi a kita pasobra mi a bay Amsterdam”, Ramon Todd a menciona.

Na Amsterdam e tabata tin e suerte di a topa cu un persona di Aruba, Pepi de Freytas (ken a fayece aña pasa) y el a bise cu e tabata bayendo curso di Spaño tur diasabra, cerca un docente (cu despues a bira Doctor) Jan Luurs, y a bise cu si e kier e tambe por bay locual sr. Todd-Dandaré a haci tambe.

Ramon Todd-Dandaré por a cubri su gastonan di estudio, pasobra ora cu el bay Hulanda el a viaha den un tankero. El a bay LAGO y eynan el a subi e tankero y a traha eynan. Ora a yega Europa, el a baha na Italia y di eynan el a subi un train yega Hulanda. Interesante ta cu tempo cu Ramon a bolbe Aruba el a yega tambe den bapor.

“Kiermen, mi tabata tin placa cu mi por a cuminza biba na Hulanda”. E temponan ey no tabata manera awo cu e studiantenan di Aruba ta yega Hulanda y ta haya un delegacion ta warda nan na Schiphol. “No, ora mi a yega Hulanda mi no tabata conoce ningun hende. Mi a conoce hendenan na Eindhoven y na Amsterdam, pero mi a haci mi bida”, sr. Dandaré a comenta y a indica cu el a traha na diferente lugar na Amsterdam.

“Mi a yega Hulanda na aña 1962 y na 1963 mi a bay traha na KNSM cu tabata un compania Hulandes di bapor, cu tabata biaha pa Sudamerica. Eynan mi tabata yena loke nan tabata yama e ‘conocementonan’, cu ta un blachi masha grandi mes, unda bo ta yena kico e barco ta bay cune, pero bo tin yene na Spaño tambe. Eynan mi a haya trabao”, Dandaré a relata.

Siguiendo cu su estudio di Spaño cerca sr. Luurs riba diasabra, el a cuminza bay Liceo anochi. “Kiermen, mi tabata traha den dia y studia anochi. Anto mi suerte ta cu na aña 1964, mi a pidi gobierno di Antiyas un beurs. E no tabata manera awo un prestamo. E tabata un beca, pero mi a haya cu forza retroactivo pa e aña anterior, pa mi por a studia”, Ramon Todd Dandaré a menciona.

El a caba su estudio anochi den un Liceo na Amsterdam, y a haci un examen nacional te na Den Haag na aña 1965 y el a slaag hopi bon. E ora ey el a cuminza studia Spaño na Universidad di Amsterdam.

Como cu Ramon su lenga materno ta Spaño, y el a haya les di e docente sr. Luurs, el a bula e prome aña di Universidad, y a caba su estudio cu hopi exito.

Sr. Todd Dandaré a menciona cu e tabata tin un docente, Raul Romer, cu ta e persona cu en realidad a pone e y Joyce na caminda pa estudio di Papiamento, na Universidad di Amsterdam. Sr. Romer tabata duna Papiamento como B-Vak. Kiermen, como materia secundario. “El a yena nos cu idea di tur e posibilidadnan cu tin cu Papiamento, y ya for di Hulanda caba nos tabata pensa den Papiamento na scol”, sr. Ramon Todd-Dandaré a señala. Ya den añanan 67-68 tabata tin revistanan di Antiyanonan na Papiamento y aki a cuminza e discusion di Papiamento na Scol.

DIARIO lo elabora mas tocante e tema interesante aki. Read more

NA COLEGIO ARUBANO JOYCE PEREIRA A CUMINZA DUNA LES DI IDIOMA HULANDES NA 1969


ORANJESTAD (AAN) — Despues cu sra. Joyce Pereira a conclui su prome estudio, cu ta maestra di scol primario y a haya un trabao na Hulanda mes, mesora el inicia su estudio pa e di dos grado di docente na Hulandes, MO-A e tempo ey, comparable cu Bachelor Degree awendia.

Den entrevista cu Matutino DIARIO den e cuadro di su 50 añanan como docente, Joyce a relata cosnan masha interesante mes.

“E problema cu semper mi a mira ta cu dunando les na Hulandes no tabata beneficia nos muchanan. Mi a cuminza cu estudio di maestro di scol basico aki na Aruba, y nos tabata core stage den e scolnan, y esey tabata un experiencia horible pasobra bo tabata prepara bo lesnan cu hopi idealismo, y ora bo drenta klas purba di duna bo les, muchanan ta mira bo cu wowo grandi pasobra nan no tabata compronde, anto cu man y pia mester a splica nan un ke otro”.

E tempo ey tabata completamente prohibi di papia Papiamento na scol y pesey e maestronan no por a splica e alumnonan nada, den nan idioma natal.

Den e klas di estudio di maestro tabata tin un grupo chikito di siete studiante hopi critico, Joyce entre nan, y nan tabata puntra e docente di Pedagogia y Didactic pasobra e sistema ta asina, sin cu nan por a haya contesta.

Nan mester a caba e estudio na Hulanda, y como cu durante su stage na Aruba Joyce a experiencia cu tin un problema cu Hulandes el a dicidi pa studia Hulandes. Pero den e estudio aki no tabata tin nada di Pedagogia ni Didactic y Hulandes como Idioma stranhero tabata desconoci y mescos como di dos Idioma.

Ora Joyce a caba su estudio como Docente di Hulandes el bolbe Aruba y a solicita trabao y a haya cupo na Colegio Arubano unda el a topa cu Ramon Todd-Dandaré. Esaki tabata na aña 1969, net 50 aña pasa, unda e cambionan di idioma di instruccion tabata hopi curu.

Como docente di Hulandes el a haya tur klas di Colegio, y el a constata cu hopi cos e alumnonan no tabata compronde, por ehemplo nan textonan. Dos aña despues Joyce a dicidi bolbe Hulanda pa obtene su MO-B, comparable cu Master, y pareu cune a studia pa su doctorado.

Drs. Pereira a menciona cu esaki tabata un temporada hopi bon, pasobra diferente estudio a sali publica, entre otro e documento “Cabes Duro” di Prins winkel, den cual el a investiga con nos muchanan ta siña y e sistema con nan ta siña den un Idioma stranhero cu no nan idioma ta e cos di mas malo cu ta stroba nan desaroyo.

Tambe na 1967, a sali e buki “From Objects to Subjects Social Barriers in the Caribbean” di Alejandro Jandi Paula (den feliz memoria) cu ta un disertacion tremendo cu ta mustra con e hendenan den nos region, den un pueblo coloniza, a wordo maltrata mentalmente, y a siña menosprecia nan mes (nan idioma, nan propio cultura, nan color, etc).

“Esey ta un di e motibonan pa cual nos hendenan nunca a subi e baricada tampoco, pa cambia nos sistema di enseñanza”, Joyce a expresa.

Ora Joyce a bolbe Aruba y el a topa cu Ramon Todd Dandaré cu tabata miembro di sindicato, e tambe a drenta den sindicato, den un temporada di movementonan mundial cu tambe a toca Aruba y eynan e situacion a cuminza cambia pero no den e scol unda nan tabata traha, pasobra eynan tabata tin resistencia contra cambio.

“En todo casi mi mester bisa cu tur e añanan cu mi a traha den enseñanza a forma mi masha hopi mes, mi a cuminza hoben pero tur e añanan ey, na APA despues y na IPA trahando cu personanan manera Ramon, Pedro Velasquez, etc., a forma mi masha hopi mes cu mi ta sinti cu te ainda mi por aporta na e cambio aki den enseñanza. Mi ta aprecia masha e coleganan cu semper mi tabata tin y cu ta mi mihor amigonan, un dama meymey di nan. Nan a aporta masha hopi no na ami so pero di hopi di nos y di enseñanza”, drs. Joyece Pereira a indica. Read more

NO POR LIMITA DISPONIBILIDAD CUIDO MEDICO PA CIUDADANO


Constitucion no ta duna orario pa cuido medico

*Alivia dolor di un pashent ta central den derecho pashent

*Mundo medico ta mara na ley den e trato cu e ta duna 

ORANJESTAD(AAN)–Na momento cu un persona dicidi pa cierto profesionnan, e no ta mara na orario. Ta pa e motibo aki, ta introduci sistemanan pa garantisa cu e personanan cu ta traha den Cuido Medico tambe, por tin tempo liber pa como ser humano nan descansa.

Den e cuadro aki a introduci dokternan di warda pa evita cu un pashent cu tin un dolor agudo of un problema cu segun e pashent no por spera, por haya asistencia di un medico y si ta necesario di tur loke e pais tin na su disposicion na bienestar di e salud di e pashent.

Na hopi ocasion DIARIO a mustra riba e hecho cu Aruba ta un pais basa riba un cuadro di ley cu ta dirigi completamente riba e bienestar di e ciudadano.

Ta esaki ta e base pa gastonan cu e pais ta haci sigur pa un bon cuido di salud di cada ciudadano, cu tin e derecho sagrado riba loke ta esencial den bida di un persona cu ta yudansa pa cuida of busca su salud.

Fondonan di pueblo ta paga pa e derechonan di un ciudadano, sigur den e sistema di AZV cu no ta laga na ciudadanonan pa defini cual ta e participantenan den mundo medico cu merece nan confiansa. E proceso di AZV ta kita for di e competencia sano den mundo medico cu ta haci cu e participante den cuido cu duna miho servicio y resultado, por conta cu mas sosten di pashent.

Leynan no ta permiti cu tin orario pa hende bira malo y haya cuido medico cu nan mester na forma urgente.

Ley ta regla e forma cu ta atende cu pashentnan, cu tin derecho di haya cuido medico urgente di personal cualifica cu ta percura pa analisa y hasta si ta necesario investiga tur loke e pashent ta trece dilanti pa asina sigura cu ora e pashent bandona consultorio, e no ta core ningun peliger.

E hecho cu hende ta drenta cu dolor cerca mediconan cu ta dicidi cu nan por bebe un pildo pa dolor y bay nan dokter di cas despues di fin di siman, no ta cuadra cu e ramo legal cu ta mustra cu e dokter mester ta bon na haltura si e pashent por sigui cu e dolor of mester di yudansa pa trankilisa e dolor pero mas ainda evita cu e dolor por tin resultado mas pisa.

Un participante den mundo medico mester scucha un pashent y nota tur loke ta bini dilanti. Caminda ta necesario e mester tuma medida urgente.

Un participante den mundo medico mester por ripara si un persona ta inventa urgencia of realmente tin dolor of ta un victima di un condicion.

E dokter di warda mester percura pa e dokter di cas di e pashent haya informacion y si ta considera necesario mester laga haci cualkier test pa sigura cu e pashent no ta na peliger.

Semper tin specialista, radiologo, boticario y tur otro personal den tur ramo di cuido medico disponibel manera ley ta exigi. Pa rutina naturalmente casonan ta warda orario di consulta di tur profesional riba tur tereno.

Cada participante den cuido ta tuma responsabilidad di bienestar di e pashent riba nan mes.

Cuido medico mester ta accesibel na forma practico na un pais continuamente. Polis ta vigila siguridad personal; bombero ta actua den caso di candela y participantenan den cuido medico ta sigura cu ta yuda pashent na tur momento.

DIARIO ta sigui cu su informacionnan na Aruba, cu mester laga expertonan bin duna conseho riba e situacion di Cuido Medico na Aruba cu a cay den gara di politica for di momento cu a cuminsa ta papia di “cinco strea” mientras strea di morto y problema tin mas chens di yega cerca di e ciudadano, cu ta alma di constitucion.

  Read more

INVESTIGACION CITGO Y BO ARUBA MESTER GUIA PUEBLO PA VOTA


Vacacion a sirbi pa AVP prepara pa eleccion 2021

*Acuerdo di Citgo a deshaci di Valero den ansha pa Citgo drenta

*Rapport Bo Aruba ta acusacion serio y tin mas berdad pa sali 

ORANJESTAD(AAN)–Ta falta menos cu aña pa candidatonan di AVP bira conoci. Informantenan clave cu DIARIO ta consulta riba tereno politico local ta papia di un temporada di politica sumamente agresivo di parti di AVP, cu kier bay uza e situacion cu gobiernonan Mike Eman I y Mike Eman II a crea pa instiga contra partidonan na mando. Mike Eman nunca lo a acepta cu el a faya cu Aruba y a pone tur su hendenan den linea pa continua na regimen Eman a base di un plan di campaña cu a wordo diseña durante vacacion 2019.

E kietud cu a reina durante vacacion no tabata solamente relaciona cu e hecho cu Parlamento a bay cu vacacion. E temporada a sirbi pa e grupo di Mike Eman termina diseño di su campaña pa 2021 cu mester duna como resultado cu Mike Eman lo bolbe como Minister Presidente di Aruba.

Informantenan clave a splica DIARIO, cu AVP no a spera cu gobierno di Evelyn Wever-Croes lo a keda na poder pa un termino asina largo despues cu e eleccion di 2017 a pone un fin na e temporada sumamente largo di gobernacion Mike Eman, cu a spart for di otro cu e caida di Nicolas Maduro.

Segun informacion cu DIARIO a ricibi, e berdad di e temporada di gobernacion di Mike Eman mester sali na cla den su totalidad.

“Sumanan enorme di pueblo a wordo uza dor di e gobernacion, cu a manipula cu votadonan,” a wordo splica.

E rapport Bo Aruba ta den man di Ministerio Publico y por spera cu prome cu eleccion yega ya husticia ta expresa su mes riba acusacionnan serio cu Algemene Rekenkamer Aruba a presenta.

E loke a wordo treci dilanti ta acusa Gabinete di no a cuida interes di Aruba y ta acusa tambe Parlamento, den cual e mayoria a permiti abuso di fondo publico.

Pues aki tin base legal pa investigacion hudicial, pues dor di Ministerio Publico, kico a pasa cu placa di pueblo den companianan caminda placa di pueblo mester a crea interes financiero pa companianan cu a participa tambe.

E investigacion ta sumamente pisa pasobra no a vigila con placa di pueblo a wordo uza supuestamente pa crea mas trabou, mas entrada pa pueblo y asina sigura cu Aruba tin entrada pa reemplasa e BBO, cu cual a hunga wega politico na 2009 pa Mike Eman gana eleccion.

Aparentemente Mike Eman no tin ningun intencion di entrega mando di AVP na otro lider pero kier sigui cu e grupo, cu e por confia incondicionalmente.

E acuerdo di Citgo tambe mester wordo investiga. Mester mira con a atende cu tur suma cu a drenta y sali pero tambe kico a pasa cu Valero.

Ora a manda Valero bay tampoco tabata bou presion pa introduci Citgo di Nicolas Maduro, cu a kibra economia di Aruba.

Mester investiga tur e acuerdonan cu a wordo firma relaciona cu Citgo y den cual a aplica secreto ilegal enfrente Parlamento y Pueblo. E hecho cu e aprobacion di e proyecto Citgo a bay contra ley den Parlamento, realmente ta haci e proyecto ilegal pa e pais cu no por uza ningun arma pa defende su mes awor enfrente Citgo.

DIARIO ta keda pendiente di informacionnan cu ta drenta y ta indica cu ta un tempo politico pisa ta wordo prepara dor di e grupo Mike Eman na caminda pa eleccion 2021, cu mester percura pa regreso di Mike Eman na timon.

Riba e potret por mira Mike Eman den compania di representantenan di Valero cu mester a entrega negoshi di combustibel local na Citgo, cu a gana riba tur tereno di Aruba segun e acuerdo firma pa gobierno Mike Eman. Read more

UN MERCADO TURISTICO DI ARUBA TA DEN AGONIA


Exactamente un aña despues di advertencia di DIARIO

*Miedo pa socialismo a bira caida di economia di Argentina

*Ministro di Financia a mustra cu pueblo ta haya loke pueblo kier 

Tabata dia 21 di Augustus 2018 cu DIARIO a reacciona riba informacionnan di ATA cu a asumi un posicion hopi positivo ariba e posibilidad pa Argentina yuda reemplasa e mercado Venezolano cu Nicolas Maduro a destrui.

Ta exactamente un aña pasa pues cu nos a adverti pa inflacion halto, pobresa y caida economico na Argentina, manera e Presidente di e pais Mauricio Macri mes a presenta na mundo.

E problemanan economico grandi cu Argentina tabata confronta for di momento cu Macri a asumi poder despues di un gobierno populista radical, tabata inflacion cu a alcansa 31.2 porciento y tabata afecta e poblacion cu mester a haci un prestamo di 50 Biyon Dollar cerca Fondo Monetario Internacional.

DIARIO a analisa henter e situacion di Argentina y a puntra si no tabata miho pa busca un pais cu tabata duna mas siguransa pa yuda Aruba reemplasa e mercado Venezolano.

Na Mei 2019, ATA a inclui Argentina den e paisnan cu no a conoce un adelanto riba tereno turistico pa Aruba cu awe hunto cu henter mundo ta observa loke ta pasa na Argentina.

Macri tabata e prome Presidente cu a bini cu un opcion nobo pa Argentina despues di decadanan di maneho Peronista y radical. E  tabata den un situacion sumamente dificil for di momento cu el a asumi poder di e pais cu e ex Presidente Kirchner-Fernando radical a laga atras.

Macri tabata kier un acercamento nobo y mester a tuma su refugio financiero cerca Fondo Monetario Internacional, cu sinembargo a entrega tambe exigencia di medidanan cu e mester a tuma.

Esaki a habri caminda pa su opositor Fernandez, kende a traha cu tur gobierno for di 1983 y ta yama su mes social democrata. Pa fortalece su poder, Fernandez a uni cu e ex Presidente Kirchner

Den e eleccionnan primario na Argentina, Macri a perde. Pueblo a rabia pasobra inflacion a sigui aumenta y e clase medio kier a castiga Macri.

Fernandez a haya su oportunidad pa bini dilanti cu ayudo di e ex Presidente Kirchner-Fernandez cu tin alrededor di un tercer parti di votonan. Dor di e union di Fernandez y Kirchner-Fernandez, Macri a perde e eleccion primario.

E resultado pa Argentina ta caida total di economia, mientras Macri ta trata di hala medidanan di IMF a atras.

Durante fin di siman mester a papia di un caos na Argentina. E moneda a cay. Argentina ta den un problema serio, mientras e candidato presidencial opositor di Macri ta nenga cu e lo sigui cu un rumbo radical aunke e tin e ex Presidente iskierdista como su partner.

Ayera e Ministro di Financia a renuncia. El a splica Macri den un carta cu el a entrega su mes na su tarea y a yuda baha gastamento di placa di pueblo.

“Nos tambe a comete eror,” el a bisa. Su palabranan mas significante tabata cu e ta scucha loke pueblo ta bisa y ta actua a base di esaki.

Asina el a subraya cu pueblo ta haya loke pueblo kier, denunciando e desastre cu e posibel regreso di socialismo lo nifica pa Argentina.

Mientras Fernandez ta sigura pueblo cu e no mescos cu e gobernantenan socialista cu el a sirbi y cu cual hasta el a uni su mes pa haya victoria, Argentina prome cu el a vota ta sinti e peso di un economia afecta pa salida di inversionistanan cu no ta tuma mas riesgo na pais socialista.

Aruba lo mester keda en espera di desaroyo pa mira kico Argentina lo produci como mercado turistico. Por lo pronto sigur e lo no yuda reemplasa Venezuela, manera DIARIO a adverti. Read more

POPULISMO TA E TRAMPA FATAL DI POLITICO OPORTUNISTA  


Analisis

Un siman nobo a habri cu un mundo observando paisnan cu ta basha abou. Hopi ta puntra nan mes kico ta pasando.  E contesta mas directo cu a wordo duna den fin di siman a bini di e Ministro di Financia di Argentina cu a mustra cu e ta duna pueblo loke e ta desea, cu ta e desastre cu un cadena di gobierno abusado a laga atras.

E palabranan aki por ta fuerte, pero nan ta encera berdad di pueblo cu a keda den desgracia na man di politiconan oportunista pero kier bolbe wordo pusha den pos dor di hende cu riba nan mes no por alcansa loke den nan soño sin frontera nan a fabrica.

Loke ta pasa na Argentina ta loke a pasa na Venezuela, a pasa na Curaçao y a pasa na Aruba pa duna e ehemplo mas cerca di cas. E ta e otro cara di regla democratico cu ta stipula cu pueblo ta haya loke e ta desea.

Awe na Argentina, gobernantenan cu a causa ruina di un pais decadanan largo ta uni pa stroba un gobierno pone orden na e pais.

Awe na Venezuela, Nicolas Maduro a destrui su pais, su region y tin mundo den lamento. Pakico Maduro por a causa e desastre cu e pais conoce actualmente?

E contesta ta masha simpel. Ta pueblo di Venezuela a vota pa Chavez, cu for di principio a duna muestra di loke e kier.

Chavez a trata na baha e gobierno democratico di Carlos Andres Perez pa e haya poder. E no a logra. Na momento cu el a alcansa poder, el a demostra kico e ta haci. Pueblo a sigui vota pa Chavez cu a destrui Venezuela y despues di su morto a entrega cadaver di bienestar di Venezuela na Nicolas Maduro.

Awe na Curaçao gobernacion actual ta lucha contra aanwijzing. Placa di e pais a caba. Turbulencia y problema serio a destrui fundeshi di e pais. Den prizon ex Ministro Presidente Gerrit Schotte ainda ta sigui instiga cu e speransa cu un dia e lo bolbe na poder.

Na Aruba e pio Ministro Presidente cu Aruba a registra den su historia, Mike Eman, a subi baricada. E no por drenta Parlamento pa contesta kico a pasa cu Aruba cu el a laga bancarota.

Nos no ta gaña. Aruba tabata den estado di bancarota ora gobierno actual a haya mandato di pueblo pa trece un cambio pa Aruba.

Mientras Aruba mester mira con e ta haci pa sali for di problema, Mike Eman ta riba baricada pa instiga e pueblo cu el a desgracia cu mentira y abuso di poder. Cu brasa y sunchi Mike Eman ta trata na silencia su consenshi cu mester ta grita pa loke el a haci cu Aruba.

E mentira di BBO cu el a uza pa hiba un maneho financiero di abuso contra e pueblo di Aruba, cu awe mester lastra e cadena di debe nacional na su pia. Mike Eman cu a trapa riba nos leynan pa entrega Aruba na Citgo di Nicolas Maduro.

Tres lider di un solo region ta uni riba un potret cu ta representa tres acusacion di pueblo. Tres pais cu a wordo herida y mester lucha pa haya un solucion, mientras e lidernan politico cu a causa nan desgracia nunca a pidi dispensa pa e drama cu nan a causa nan pais.

Populismo ta e don di ciega publico. E talento special di politiconan oportunista cu awe ta desgracia di democracia.

Nan ta mata e creencia di pueblo den politica limpi. Nan ta destrui camindanan pa e pueblo haya solucion. Tur loke nan tin nan dilanti ta e oportunidad cu politica ta ofrece pa nan eleva nan mes.

Hugo Chavez, Gerrit Schotte, Mike Eman: tres lider politico cu a demostra kico ta populismo y con por probecha di buena fe di pueblo pa alcansa poder! Read more

29 ORGANIZACION A DUNA UN APORTE IMPORTANTE PA E RAPPORT TOCANTE DERECHONAN DI MUCHA NA ARUBA


Sra. Caroll Kock di ATHA:

ORANJESTAD (AAN) – Sra. Caroll Kock di Asociacion di Trabao pa Hubentud (ATHA), ta e persona cu ta coordina e proyecto pa e rapportnan tocante e derechonan di mucha.

Den entrevista cu DIARIO, sra. Kock a cuminza cu e rapport pa GNO’s (Organizacionnan no gubernamental) unda a invita 80 persona, entre miembro y no miembro, pero cu tur dia ta atende cu hobennan.

E participantenan a wordo parti den 7 grupo manera scounting, centronan di bario, deporte, etc.

Entre 8 di April cu 7 di mey ATHA a entrevista nan, riba kico nan ta mira cu mester wordo haci ainda na Aruba, encuanto derechonan di mucha.

En total 29 organizacion a duna un aporte significativo na e participacion aki. E puntonan cu mas a haya atencion di parti di e organizacionnan, den un enfoke general, tabata:

  1. famia y cuido alternativo.
  2. Enseñanza y actividad cultural den tempo liber.
  3. Handicap, salud y bienestar.

Esaki ta e prioridadnan cu e organizacionnan a expresa cu nan ta haya mas importante.

Hopi di e organizacionnan aki ta haya cu tin hopi negligencia; mayornan hopi biaha ta traha demasiado y tin hopi famia kibra, y esaki ta haci cu hopi mucha ta keda neglisha.

E ora ey ta sumamente importante pa pone hopi atencion riba e famianan pa nan por duna e atencion necesario na nan yiunan.

Incluso e Tratado Universal di e Derechonan di Mucha, ta pone e mayornan como e prome yama pa cuida nan yiu pa nan safe. Sra. Kock a subraya cu no ta tarea prome di gobierno ni di ningun NGO, ni di ATHA, pero si di e mayornan.

Sinembargo e Tratado ta bisa cu si gobierno ta mira cu hopi mucha ta wordo neglisha, si e famianan no tin medionan (pa cualkier motibo) gobierno mester sostene e famianan ey pa van op e muchanan aki debidamente.

E rapport di e hobennan di Aruba cu ATHA a entrevista, tocante kico nan ta haya di e Derechonan di Mucha, y unda nan ta mira cu e derechonan di mucha ta wordo viola. Tabata tin 29 pregunta den e encuesta, di cual cuater tabata preguntanan habri y e otronan tabata escogencia multiple, facil pa e hobennan mes yena. 95% di e hobennan sa cu nan tin derecho.

No obstante un tiki mas cu mitad so a bisa cu nan a haya informacion tocante derecho di mucha. Un tercer parti a bisa cu nunca nan a haya informacion tocante derecho di mucha, y esey ta algo cu kizas ATHA por traha riba dje. Cuater di cada 5 mucha a menciona alomenos un derecho, locual ta bon. Ora nan a wordo puntra cual ta e derecho cu nan ta haya mas importante, nan a contesta cu derecho riba trato igual pa mucha of hoben, sin discriminacion.

Na di dos lugar a bin derecho riba proteccion contra abuso y maltrato, na di tres lugar derecho pa expresa nan opinion y na di cuater lugar derecho pa haya amor y cuido.

E cuater derechonan aki ta locual nan ta haya cu ta wordo viola mas na Aruba. Y na unda nan ta haya cu e derechonan aki ta wordo viola mas tanto, nan a contesta cu na cas, riba caya y na scol.

Ora nan a wordo puntra: “pero si un dia un hende ta viola bo derecho, cual ta e persona cu prome bo yega cerca dje”, mayornan tabata e prome y na di dos lugar, Juffrouw di scol.

Sra. Kock a menciona cu esaki ta cosnan importante pa comunidad sa. E estudio aki a mustra cu mayoria di e muchanan kier haya mas informacion tocante nan derechonan, y importante tambe ta cu 60% di e muchanan kier participa den un actividad despues di scol. E actividadnan cu nan kier participa na dje ta, na prome lugar deporte, na di dos musica, danza y teatro, y na di tres lugar pasa tempo cu amigonan. Cushinamento cu actividad di man tambe a score hopi halto.

 

 

  Read more

CAS PRINCESA ARUBA TA HABRI INSCRIPCION


ORANJESTAD (AAN): Inscipcion pa Little Princess,  Little Miss Aruba  y PreTeen Aruba a habri.  Tur mayor cu ta interesa pa nan princes competi pa un di e titulonan aki, por tuma contacto cu Jessica Anthony.  E edadnan ta di 4 pa 6 aña, 7 pa 10 y di 11 pa 14 aña.

E aña aki lo tin varios workshops manera di huña, disciplina, djente y tambe lo tin bustrip, fashion show y breakfast pa e reina nan. E final ta dia 2 di november 2019 den Cas di Cultura.

Cas Princesa ta cumpli e aña aki 10 aña y ta priminti un spectaculo grandi y bunita. Read more