ART RULES TA YEGANDO SI FIN, THE PANCAKE GALLERY TA TRASPASA E ANTORCHA


ORANJESTAD (AAN): Diamars atardi, DIARIO a ricibi e relato aki di e rumannan Ira y Ayra Kip, mustrando cu nan lo stop cune.

Despues di 10 aña di produccion di e programa educacional Art Rules, fundadornan di The Pancake Gallery Foundation: Ira y Ayra Kip a dicidi di conclui e programa. Den un carta habri e fundacion ta expresa su gratitud y aprecio na tur cu a yuda haci Art Rules posibel.

Art Rules a cuminsa como un vision pa crea un plataforma di educacion di Arte riba e isla di Aruba. E programa a lansa su prome edicion na 2010 cu mas di 200 participante.

   Aki Ira y Ayra Kip mes ta bisa:

“Nos a realisa cu nos tabata bezig cu algo grandi ora cu tanto mucha a aparece pa e kick-off. Crea den solamente 6 luna cu un budget chikito di nos mayornan pa lanta un stichting, nos a logra bende nos vision na algun negoshi local y diferente subsidiario di gobierno di Hulanda. Den e prome edicion nos a reuni 20 amigonan artista for di rond mundo pa guia lesnan den diferente disciplina den un programa intensivo di 2-siman. E programa a continua cu 6 edicion consecutivo cu artistanan international bishitando Aruba for di rond mundo; New York, Washington DC, Baltimore, L.A., Paris, London, Amsterdam. Algun hasta a biaha for di mas leu mane Japon, Sud Africa pero tambe mesun importante artistanan di hermana islanan Curacao y St. Maarten.”

Mientras cu e programa y su popularidad a crece, nos fundacion a busca e oportunidad di expande su vision na otro paisnan. Un intento pa lansa na Surinam no a logra, pero cu ayudo di nos sponsor principal RBC Royal Bank y dos visionario hoben y fundadornan di Curacao Cares, Lysaye de Windt y Deva Silliee, Art Rules Curacao a bira un realidad na 2014.

Art Rules Curacao a crece bira un programa den su propio derecho, crea y diseña especificamente pa e industria artistico di Curacao, cu tin un rikesa cultural fuerte. Cu sosten immenso di comercio, scolnan, mayornan y claramente artistanan creciente buscando oportunidad pa experiencia Art Rules, el a bira un exito instantaneo.

Sin embargo, un programa no por sobrevivi sin inversion sostenibel y despues di un evaluacion riguroso di nos realidad financiero nos tabata forsa pa tuma un break na Aruba, cu e deseo di regresa despues di un aña. Lamentablemente, 2 intento na 2017 y 2018 no a logra.

Mescos tabata e caso na Curacao despues di a completa edicion 2018. E tabata un di e edicionan mas exitoso den tur e 5 añanan di Art Rules, pero financieramente nos a yega na e punto critico. E clima economico na Curacao cu a cambia drasticamente den ultimo añanan, tabata tin un impacto directo ariba nos programa, asina drastico cu nos no tabata sigur si nos por a presenta nos showcase final na 2018.

Ademas di ta un peso financiero, nos mester a admiti cu fisicamente, mentalmente y spiritualmente e retonan aki a cuminsa haci efecto ariba nos bida personal. E preguntanan cu nos a puntra nosmes tabata claro y asina e resultado tabata duidelijk tambe. Adicionalmente nos ta dos persona creativo sumamente ambicioso kende despues di 10 aña, ta cla pa un reto nobo.

   Nos a completa nos mision y yega na nos meta inicial?

Art Rules semper a enfoca su mes riba e mision di cultiva habilidad door di crea espacionan sigur caminda cada ken por para den nan berdad y tin e capacidad completo pa desaroya sumes. Sin embargo cu capacidad ta bini hopi responsabilidad.

Pa e motibo ey Art Rules a sobrepasa educacion di Arte. Nos ta un movement! Un accion cu pa 10 aña caba a planta simia di inspiracion y perspectiva nobo den mas di 1200 individuo. Un accion cu a introduci metodonan y ideanan di rond mundo cu lo tin impacto riba artistanan mes pero tambe e sector di arte na Curacao y Aruba, e ta un identidad cultural cu ta mantene su autenticidad relaciona cu resto di mundo.

    Pues si, mission cumpli!

Nos ta orguyoso cu na 2009 e movement a invigora e sector di arte y cultura na nos islanan materno di Aruba y Curacao y cu nos hunto cu un gran cantidad di hende a forma parti di dje. Esta un bunita tempo pa biba aden.

Nos deseo ta cu hobennan riba e isla sigui persigui nan ambicion y soña di ta e mihor version di nanmes, paso tin asina hopi talento riba tur dos isla, manera diamantenan bruto.

Nos ta spera cu mundo sigui mira nos experiencianan y haya inspiracion pa crea y comparti mas cu nan por. Nos ta sigur cu e proximo generacion di productornan creativo ta cla pa sigui e caminda y nos ta honra pa pasa antorcha na nan.

Danki na tur cu a inverti den Art Rules cu fondonan, donacion, subsidio, sponsorships, tempo, ideanan, conseho y mas cu tur cos: Amor.   E relato ta firma pa Ira y Ayra Kip.

  Read more

PDVSA CU CONEXION DIRECTO CU GRUPO ISKIERDISTA NA CURAÇAO


Grupo Chines sin placa tabata tin union cu Venezuela

*Accion sindical agresivo tabata trata di forsa instabilidad

*Hulanda mester a rescata democracia ora Schotte a gara poder

ORANJESTAD(AAN)–Un hecho cu un avion di grupo Nicolas Maduro por a baha na aeropuerto di Curaçao y e permiso cu un representante di Nicolas Maduro a haya pa papia na nomber di PDVSA cu trahadonan na e isla, a causa hopi conmocion.

Pa basta tempo e isla ta alerta pa envolvimento iskierdista centralisa rond di e refineria. Despues cu gobierno a anuncia PDVSA cu no ta prolonga e contracto debi cu e compania no por a honra su debernan, e pais a conoce un serie di desaroyo negativo cu a culmina na 2017 cu un golpi di estado.

E surgimento di Hugo Chavez a trece un aspecto nobo pa refineria di Curaçao, cu a haya su mes directamente mara na un regimen iskierdista dictatorial. E hecho cu Chavez a wordo eligi como Presidente di Venezuela a haci cu no por a nenga un relacion cu PDVSA cu e regimen iskierdista Venezolano a uza na fabor di expansion comunista den e region.

Uno di e asuntonan importante tabata e entrada y salida di personanan directamente mara na Chavismo y tambe na e refineria, cu Chavez a haci exclusividad di socialismo.

Tabata conoci na Curaçao, cu den mundo politico tabata tin conexion ideologico cu  Cuba. Na entrada di Chavez e relacionnan aki a expande pa e refineria.

Mas y mas por a scucha di relacionnan directo entre politiconan iskierdista y Chavez, cu sigur tabata tin un relacion directo y hopi cera cu e grupo di Gerrit Schotte, kende a cuminsa den MAN pa despues lanta su mes partido.

Mientras economia di Venezuela a cay, problemanan financiero tambe a surgi na e refineria cu no tabata conoce mantencion debido y a bay atras.

For di e momento cu a adverti PDVSA cu no ta prolonga e contracto, por a nota crecemento di instabilidad, principalmente cerca e sindicatonan iskierdista den cual  sigur tabata figura Errol Cova cu tabata parti di e partido Laboral, cu a wordo rechasa ora el a participa na eleccion y nunca a duna e resultado cu e tabata kier.

Un cantidad di politico di e isla a yega di labora na e refineria durante epoca di Chavez y Maduro.

Na 2016 Curaçao mester a bay eleccion den un situacion cu pueblo a wordo adverti pa tene cuenta cu democracia di e pais. Helmut Wiels, iskierdista, a wordo asesina na 2013 y pa e Ministro di Financia di Schotte y tambe ruman di e dirigente actual di Korsou di Nos Tur, Amparo dos Santos ta deteni.

E partido di Wiels a cay hopi despues di su morto pero debi cu no tabata tin eleccion mas a keda na mando te eleccion di 2016. Prome cu eleccion e Prome Ministro a anuncia cu un grupo Chines tabata kier e refineria den cual PDVSA por a sigui entrega petroleo. A resulta cu e grupo no tin placa. Na 2018 Gobierno nobo a rechasa nan pero nan a sigui insisti.

Na 2016 instabilidad agresivo a keda registra na e refineria caminda exigencia pa placa, cu finalmente Comercio di Curaçao a pone riba mesa pa stop e accion dirigi pa Errol Cova,  a causa disturbio serio.

For di e momento periodicamente Curaçao a keda den gara di instabilidad, cu a culmina despues di eleccion ora Gerrit Schotte a perde eleccion pero a logra pone politiconan cambia di partido y asina forma un gabinete cu el a dirigi pafo di gobierno. E no por a bira Prome Ministro pasobra tanto su persona como otro miembronan di su partido, manera e ex dirigente di MAN cu a uni cu su partido, no a pasa screening.

Na 2017, el a baha gobierno nobo cu asistencia di politiconan cu a cambia di partido y como prome acto a stop eleccion cu segun ley mester a tuma luga pasobra e Prome Ministro cu el a baha, a yama eleccion nobo prome cu su retiro.

Hulanda mester a sigura eleccion nobo cu Gobernador di Curaçao a supervisa como parti di Instruccion.

Instabilidad a continua sigur rond di e refineria y dirigi pa Errol Cova, cu siman pasa a keda menciona como candidato pa bira Ministro Presidente ora sindicatonan y dos partido iskierdista (uno di nan di Schotte den prizon) baha gobierno.

E salida di PDVSA ta wordo opone dor di e grupo Iskierdista, cu ta insisti pa mantene PDVSA.

E hecho cu un representante di Nicolas Maduro a wordo ricibi como ministro, a cay hopi malo na Curaçao, caminda ta tene cuenta cu e refineria ta baluarte iskierdista di e pais y motibo di instabilidad constante.

 

 

  Read more

E BALOR DI REGION DI CARIBE PA E ORDEN MUNDIAL COMUNISTA


Analisis 

Un di e gruponan di isla mas importante na mundo, ta region di Caribe. For di principio di Conkista, nan a hunga un papel importante den historia moderno skirbi.

Ni e avance cientifico di medionan di transportacion por kibra e balor di e islanan den e curason di e continente Mericano. Ta parce cu naturalesa mes kier a duna nan un nificacion special riba mapa mundial, cu un dia lo a bira rondo pa asina descubrimento di e continente Mericano for di Europa y Africa lo a bira mas facil.

E localidad di cada isla ta parce un diseño profesional pa cualkier avance pa yega costanan di e diferente partinan di e continente.

E balor strategico di region di Caribe a sirbi durante e conkista Europeo como centronan for di cual por a sigui explora e mundo desconoci cu Cristobal Colon a bisa cu ta existi.

Region di Caribe a sirbi pa civilisacionnan alcansa e continente Mericano pa durante Siglo 20 haya un nificacion nobo pa un expansionismo Comunista.

Ora comunismo a bira realidad na Rusia, expansion militar a cuminsa. E necesidad di poder a haya un nificacion grandi pa e grupo elitario mundial nobo, cu realmente a sigui e ehempel di Napoleon.

Nan ta bay contra e orden estableci den sosten na revolucionarionan, cu mester di un yudansa pa subi e trapi social of tin problema cu nan mester y mester di poder pa nan tin e sentido cu nan ta importante.

Paisnan cu un orden di ley, ta haci dificil pa comunismo progresa. Den comunidadnan chikito ta facil crea problema, instabilidad y intrankilidad cu e nucleo comunista mester.

Comunismo no ta permiti mucho competencia den liderazgo cu tin poder absoluto, mientras e totalidad di pueblo mester sirbi nan interes. E comunidad chikito ta facil pa captura y hopi bes tin hendenan ambicioso cu na pais grandi tin mas espacio pa crece.

Riba e islanan chikito pues ta mas facil haya candidatonan pa lider comunista, cu no mester di preparacion di scol pero si ta capaz pa dera nan consenshi pa acepta loke nan ta ambiciona.

Rasa, placa, religion ta algun di e instrumentonan cu comunismo ta uza pa crea e division cu e mester pa alcansa intrankilidad y problema cu sosten di pueblo cu ta pensa cu e tin bon intencion.

Den Caribe tin islanan pober. Den Caribe tin diferente rasa. Den Caribe tin hopi forma pa causa problema y asina yega den curason di e continente Mericano, cu ta haci mas facil pa sigui cu expansion.

Pa cambia un pais grandi, mester atende cu un poblacion cu ta habita un teritorio grandi. Conkista di un isla ta mas facil.

Si mira con comunismo ta avansa den Caribe, region di islanan chikito independiente cu sigur ta limita den defensa, capital y militarismo propio, ta mira e forma con caminda ta wordo habri pa yega America Central, America Latino y Merca.

Paisnan den region di Caribe mester ta cauteloso. Nan ta keda atractivo pa expansionismo, mas ainda di e cadena comunista cu ta un circulo cera di poder cu ta proteha su mes na prome luga cu eliminacion di consenshi y no tin problema pa destrui con tal cu e meta ta alcansa. Read more

MIEMBRONAN DI UN “OUDERENRAAD” NO NECESARIAMENTE MESTER TA PENSIONADO


ORANJESTAD (AAN): Cuido di nos grandinan ta un prioridad halto pa Gabinete Wever-Croes. Gobierno tin preocupacion pa e cuido di nos grandinan y ta trahando na benificio di nos grandinan. Den e programa di Gobernacion tin un maneho pa introduci un ‘Ouderenraad’, un conseho di hendenan mayor.

E topico aki ta uno hopi interesante mirando cu e ta traha den beneficio di nos grandinan. Ouderenraad ta un conseho di nos grandinan, un instituto cu Gobierno di Aruba kier crea p’asina constantemente por ricibi consehonan tocante diferente aspecto cu ta afecta nos hendenan di edad.

E miembronan y directiva di e instancia aki no necesariamente mester ta pensionado pero tambe personanan cu tin atencion riba temanan cu ta tene nos pensionadonan ocupa. Tambe por ta geriatrianan cu ta cuida salud di nos grandinan of esnan cu ta cuida nos grandinan sea na cas of na instancianan pa nos grandinan.

Tambe tin e aspecto financiero cu ta afecta nos grandinan pa motibo cu ora nan bay cu pension nan entrada ta bay atras pero nan gastonan ta keda mescos. Ainda Gobierno no a logra tur asunto di impuesto. E Prima di AZV y tarifa di belasting a ser baha caba pa pensionadonan por ta mas alivia.

Infrastructura ta otro punto di enfoke pa motibo cu mester sigura cu tur e edificionan di departamento di Gobierno, banconan y caya grandi etc. ta accesibel pa nos hendenan di edad y nos hendenan cu tin un deficiencia fisico.

E tema di Ouderenraad a ser delibera detayadamente cu representantenan di OPA y aki OPA a bin cu un concepto hopi interesante y asina Gobierno a tuma e decision di “partner” nan mes cu nan pa cu e creaccion di e instancia aki.

E concepto lo ta uno casi identico na loke SER (Sociaal Economische Raad) ta haciendo aworaki. SER manera ta conoci ta un grupo di persona cu ta worde apunta pa sector priva y sector publico cu via un secretariado ta duna conseho na Gobierno riba nivel economico y social.

Por ehempel e tema di aumento di salario minimo semper mester bay via SER. Mirando e exito di SER, Gobierno kier bin cu Ouderenraad p’asina nos grandinan tambe por haya e atencion necesario.

‘Vergrijzing’ no ta un problema sino mas bien un desaroyo den bida hopi bunita ora cu ciudadanonan yega na un edad halto. Gobierno kier duna mas participacion na tur esnan cu a yega na un edad bunita y cu por y kier contribui na bienestar di nos pais”, Prome Minister Evelyn Wever-Croes a enfatisa. Read more

SNBA TA ORGANIZANDO UN SUMMIT PA DIA 21 DI AUGUSTUS


Pa cuminza cu un movecion positivo pa San Nicolas

ORANJESTAD (AAN) – Andres Hernandez, miembro di San Nicolas Business Association, a elabora tocante e desaroyonan cu tin den e distrito y entorno un reunion cu lo tuma lugar na Augustus proximo, pa tin mas movecion na San Nicolas.

Hernandez a expresa cu pa hopi tempo nan ta scucha tocante diferente plan pa desaroya e distrito cu ya SNBA no ta kere den plan mas.

No obstante tin accionnan positivo cu ta bay tuma lugar, y ya caba danki na famia de Veer, nan tin nan cinema Principal, habri di nobo.

Y pa e parti pabao di e caya tin plannan hopi concreto y muy pronto lo scucha mas di dje y mira e trabaonan cu lo sosode.

E caya principal ta den un situacion critico actualmente, unda tin entre 19 pa 20 comerciante cu no ta bar of banco y tin cinco di nan cu a indica caba, cu pa inicio di otro aña lo no ta habri mas pasobra nan ta cerando caha cu entrada ridiculo. E ta dificil pa nan sobrebibi si no tin entrada.

Sr. Hernandez a duna di conoce cu SNBA a bin cu un plan master, cu ta un summit. Esaki lo tuma lugar dia 21 di Augustus na Santa Teresita Center a porta cera y sin presencia di publico ni prensa.

Nan lo tin presencia si di ministernan, lidernan di fraccionnan di Staten, y di otro instancianan cu por haci un diferencia pa e distrito di San Nicolas. Ademas nan tin tres inversionista di afo, cu a confirma caba, y diferente inversionista local cu tambe lo ta parti di e summit aki.

Nan mester bin cu nan proyecto, su solucion socio-economico, y e proyecto mester cuminza seis luna despues di e fecha di e summit.

E ta mustra algo complica pasobra nan ta pidiendo pa cuminza den e proximo seis lunanan pero e ta posible, segun sr. Hernandez.

E Asociacion ta spera cierto cambionan. Hernandez a comenta cu el a scucha minister Otmar Oduber bisa cu e presupuesto lo wordo poni di inmediato, pa por trece cambio den e caya cual ta pendiente for di e gobernacion anterior, y mescos cu a haya Promenade mester haya e caya principal renova.

Entre otro mester haya wifi, señalnan cu no tin suficiente, of no ta existi pa tin un fluho den e caya. A haci un avaluo den un dia completo, y nan a conta entre 800 cu 1000 v-cars cu ta pasando bay den direccion di e beachnan pariba, pero nan no ta pasa riba e Caya pasobra mayoria di nan no sa ni unda esaki ta  ni sa con pa drenta pasobra no tin un guia, y riba esey nan ta bezig cune tambe.

Sr. Hernandez a expresa cu si nan logra sikiera tres inversionista den e seis lunanan fiha, e Asociacion por ta contento. Sinembargo, e invitacionnan ta wordo entrega personalmente, cu un entrevista, y den esaki nan ta wak kico ta e posibilidadnan y di cada invitado lo sa kico nan ta bay trece dilanti.

Sr. Andres Hernandez a señala cu e preocupacion di tur hende di San Nicolas ta e Hickinson Hotel na final di Caya, pero pa esaki tin un solucion caba. E tin entendi cu henter e famia a bay di acuerdo caba y cu Huez a nombra e persona caba, cu ta bay ta encarga cu esaki caba y cu tin cuater cumprado pendiente. E asociacion tin comunicacion cu Hotel Marchena cu tambe tin un promesa di apertura di casino, y cu nan a anuncia cu si e hotel pariba nan ta pone e prome bloki, nan lo sigui cu e renovacion di e hotel, unda nan tin permiso pa 40 camber y tin e posibilidad di casino abao.

Na momento cu wak esaki so, y un caya principal renova, San Nicolas ta bay cambia, sr. Andres Hernandez di SNBA a subraya. Read more

HUBERT DIRKS: “E TRAHADOR NI E DUNADOR DI TRABAO POR HAYA MAS MEDIDA RIBA DJE”


E relacion tripartite ta den tension:

ORANJESTAD (AAN) — E lider di FTA, Hubert Dirks, a expresa den entrevista cu DIARIO, den e cuadro di celebracion di 55 aniversario di e federacion, cu e retonan di aworaki no ta facil.

E situacion ta keda dificil tanto pa e poder di compra di e trahador como tambe su mentalidad y e parti di formacion ta sumamente importante pa nan por siña balora nan trabao, e pakico nan tin e trabao, y esey ta nifica produci y yuda e compania bay dilanti y hunto cune bay dilanti como trahador tambe.

Pero di otro banda si e dunador di trabao no ta trata su trahadornan bon, y e situacion laboral no ta agradable esaki ta afecta e productividad y esaki hopi biaha e dunador di trabao no ta compronde; nan tin mal maneho, caracter di gerentenan incorecto, violacion di e leynan y asina mes nan ta insisti cu e trahador tin cu produci y esey no ta bay.

Dirks a enfatiza cu tin dunador di trabao cual situacion ta dificil, e costo di haci negoshi no ta nada facil, pero tambe ta asina cu hunto cu e trahadornan nan por logra sobrepasa tur e retonan aki.

Pa nos Pais Aruba, e relacion tripartite aworaki ta bao tension unda tin un gobierno cu mester di mas entrada y baha gasto, loke ta hopi dificil, cu un debe asina grandi cu ta casi imposible pa manehe, pero di otro banda FTA ta haya cu e trahador no por haya ni un medida mas riba dje como tampoco e dunador di trabao.

Pero si como tripartite nan tur sinta hunto pa balansa e situacion den un “win, win, win” nan por cana dilanti y vence e retonan existente.

Finalmente, e Presidente di FTA sr. Hubert Dirks a expresa cu e trahadornan a lucha tur tempo, Aruba a demostra esey, y FTA a y ta hunga un rol hopi grandi.

“Nos ta desea e trahadornan hopi forza y perseverancia. Nos sa cu e no ta facil, cu tin momentonan mas dificil cu otro pero no lubida cu abo como miembro, como Shop-steward ta haci e sindicato”. Read more

HUNTA DI SUPERVISION DI LOTTO PA DEPORTE MUSTRANDO CU NUNCA TABATIN CREDIT CARD DEN DIRECTIVA DI LOTTO


Ta pidi rectificacion di Minister Dangui Oduber

ORANJESTAD  (AAN): Den un carta fecha dia 18 di juli 2019, E Hunta di Supervision di Fundacion Lotto pa Deporte ta demanda un rectificacion den 24 ora despues di a ricibi e carta, for di Minister Dangui Oduber, encarga entre otro cu deporte.

E mandatario a publica riba su pagina di Facebook dia 15 di Juli ultimo, cu directiva di Lotto lo a pidi un Credit Card cu un limite di 10 mil dollar pa luna pa cada un miembro. Mas leu e mandatario a acusa nan di abuso y cataloga nan como e “Cartel di Lotto”.

E directiva di e fundacion a keda sorprendi pa contenido di e publicacion di Minister, pasobra ta purba crea e impresion cu ta e directiva actual lo tin Credit Card di e fundacion, locual no ta cuadra cu berdad. Parce cu na luna di Mei 2010, miembronan di e direcitva di e tempo aya, cu no ta miembro awendia mas, berdad lo a pasa un decision asina pero cu nunca a ehecut’e.

A verifica cu ambos banco cu nunca directiva di Lotto tabatin ni tin Credit Card na nan disposicion. Esaki no semper tabata asina, pasobra den pasado si Endy Croes, cu awendia ta Parlamentario, si tabata dispone di Credit Card di e fundacion.

E directiva ta haya cu, dor di e declaracionnan di Minister Dangui Oduber, no ta atacha solamente e fundacion sino tambe e bon nomber di e miembronan di directiva, sin cu nan tin algo di haber cu e decision di e tempo aya cu nunca a wordo ehecuta.

Door di haci esaki toch, Minister ta actua empugna cu e sentencia di Hues di dia 9 di april ultimo, den cual a ordena a mandatario pa laga e Directiva traha sin molestia nan. Mirando cu e tipo di declaracionnan asina ta haci daño na reputacion di miembronan di e directiva y pa evita mas daño inecesario, a demanda pa e mandatario rectifica den 24 ora di tempo.

Den caso cu no cumpli, lo evalua pasonan legal civilmente contra e Minister y si mester tambe pasonan penal den su contra. Nan ta spera di no mester yega asina leu den e proceso aki.

Fundacion Lotto pa Deporte ta e organo cu ta portado di e permiso legal pa organisa wega di number y Lotto riba nos isla. Nan ta supervisa e trabounan di CBN na Aruba den organisacion di Lotto di Aruba y ta percura pa fondonan di ganashi di benta di lotto bay na Comision di Subsidio di Deporte.

Anualmente ta contribui cu no menos di 4 miyon florin na e comision, cu na nan turno ta sostene organisacionnan deportivo. Aña pasa Fundacion Lotto pa Deporte tabatin un entrada di riba 48 miyon florin na benta di loteria riba nos isla. 

  Read more

LUCHA, RETO Y LOGRONAN TA MUESTRA DI MADUREZ CU AWOR FTA TA CUMPLI SU DI 55 ANIVERSARIO


Entrevista cu e presidente Hubert Dirks:

ORANJESTAD (AAN) — E Federacion di Trahadornan di Aruba (FTA) ta di celebracion di aniversario y reflexion, yegando su 55 aña di existencia.

Den entrevista cu e Presidente di FTA sr. Hubert Dirks, a expresa cu esaki ta un muestra di e madurez di e sindicato y cu loke a wordo pensa e tempo aya, pa e fundadornan no tabata algo malo, sino un necesidad.

Y sigur awendia, cu sinta na mesa di dialogo pa busca solucion conhuntamente ta e metodo pa yega na e desaroyo, FTA a sa di haci esey. Dirks a acentua cu awo mas cu nunca mester sigui cumpli cune.

E lider sindical a expresa cu 55 aña di existencia ta mustra tambe perseverancia, di tur esnan cu a milita den FTA.

Tabata tin varios directiva; hopi hende a pasa den e filanan di FTA, varios presidente manera sr. Wiky Maduro, C. Richardson, Vito, Anselmo Pontilius, Rudy Geerman, y awor sr. Dirks mes.

Nan tur a sa di duna nan granito na bienestar di e trahador. Nan a hiba e luchanan na unda tabata tin mester. Sr. Dirks a recorda e lucha den añanan 70 den sector hotelero, e trahadornan turco, y el a subraya cu na unda cu FTA mester para e ta haci esey.

E lider sindical kier a felicita y gradici tur e miembronan di FTA y tur su personal cu a traha pa hopi tempo mes, entre nan Adelita Tromp cu no ta traha mas cu e federacion pero cu a dedica 48 aña na e organizacion aki.

Ainda tin fundadornan manera Rufo de Cuba, Rosendo Colina y sr. Bareño cu ta na bida, pero lamentablemente esnan cu a funda FTA manera Wiky Maduro y Chinto Diaz no tey mas, pero si a haci un tremendo trabao. Asina sr. Dirks a subraya. El a agrega cu mester mira tur loke e sindicato a haci te awor y su lucha pa husticia social, cu ainda ta keda valido. Ainda FTA ta bringa pa un trabao decente y cu salario husto. Y solamente trahando hunto nan tin e forza como sindicato, pa por logra esey.

Dirks a splica cu FTA a logra hopi pa trahadornan, vooral di Sector Hotelero y algun banco. Esun mas antiguo ta AMRO Bank cu despues a bira RBTT y awor RBC te awor ta miembro y sigur nan por a conta cu un CAO riba nivel. Ainda nan ta hibando e lucha y retonan, den sector bancario, y tambe den sector hotelero unda nan ta logra contratonan colectivo cu por wordo uza como modelo.

FTA ta representa otro instancianan tambe manera seguronan, fundacionnan, y varios compania mas unda por papia di bon contrato colectivo y sigur na nivel nacional FTA a lanta para varios biaha. Sr. Dirks a expresa cu no mester laga un situacion yega hopi leu pa logra e cambionan cu mester den e sociedad, pasobra esaki ta un trabao di tur dia.

Sr. Dirks a señala tambe cu e mentalidad anti sindical, lamentablemente ta keda. Esaki ta pasobra esnan cu tin miedo di sindicato tin algo di sconde. Nan tin plannan pa abusa di e clase trahador, door di viola e ley laboral, por ehemplo. El a subraya cu esun cu ta respeta e leynan no tin nada di sconde y mas bien si traha cu e sindicato por bay dilanti conhuntamente.

  Read more

MINISTRO ORGUYOSO CU ROP 2019-2029 LO PERCURA PA BALANSA ENTRE DESAROYO INFRASTRUCTURAL Y NATURALESA


ORANJESTAD (AAN): Diahuebs 18 juli despues di Gobernador, Minister encarga cu Desaroyo Teritorial, Infrastructura y Medio Ambiente Otmar Ouber a firma e ley cual kiermen cu oficialmente Aruba tin un Plan di Desaroyo Teritorial / ROP vigente pa añanan 2019-2029.

  Proceso:

E proceso ta uno cual a duna hopi publicidad cu colaboracion di expertonan di Advies Bureau RHO, a reuni cu hopi stakeholders na diferente ocasion, NGOs, diferente consulta cu comunidad y conseho di diferente comision entre otro.

Importancia:

Minister Oduber a splica cu durante e 10 añanan anterior, apesar cu tabatin un ROP, no a percura pa comunidad haya e informacion debido y educacion di kico por y kico no por den e ROP. Contrario na esaki, pa ROP 2019 Gobierno a cana e caminda di conscientisacion den comunidad den forma extenso!

Por mira esaki refleha back den e cantidad di riba 130 zienswijze cu a worde entrega. Compara cu rond di 10 cu a worde entrega pa ROP 2009.  Algo cu por observa tambe ta cu anteriormente no a pone accento debido na e respet cu mester tin pa ROP. Hopi biaha esaki tabatin di haber cu no tabata consciente di locual e ROP ta encera, y a hinca e propio ciudadano y departamentonan di Gobierno den problema.

Gabinete Wever-Croes a tuma esaki na serio y a percura pa ehecucion tuma luga manera cu ley LRO ta describi. Hunto cu publicacion di e Landsbesluit, lo percura pa cada un zienswijze cu a worde entrega conhuntamente cu conseho di Raad Ruimtelijk Ontwikkeling haya un contesta/ carta individual y percura cu e contesta riba cada uno worde refleha den e ROP cu ta worde publica. Pa di e forma aki comunidad den su totalidad por mira e contestanan cu tabatin riba diferente punto.

Awor ta continua tambe cu e trabaonan pa loke ta e ROPV. A compromete como Gobierno cu lo percura pa tin e voorschriften di ROP, di acuerdo cu ley. Den esaki, e mesun proceso discribi pa ley lo worde sigui y dentro di un pa dos luna, lo percura pa e concepto ta riba mesa.

Pa despues sigui cu encuentro cu publico y stakeholders, conforme terminonan describi. Salvaguardiando derecho di cada ciudadano y pa loke ta ‘richtlijnen’ (guianan) di Gobierno, tambe lo ta hopi cla defini. Read more