SELECCION DI ATLETISMO AGE GROUP CLA PA REPRESENTA ARUBA DEN E 2ND NACAC AGE GROUP NA SAN SALVADOR


ORANJESTAD (AAN) – Federacion di atletismo, AFF ta presenta su seleccion di atletismo Age Group 2019. E seleccion ta cla pa competi na e 2nd NACAC Age Group Championship na e ciudad di San Salvador, El Salvador.

Mester bisa cu e seleccion pa varios luna a prepara nan mes pa competi na e campeonato aki. Tin dos diferente categoria di edad cu lo competi na e NACAC Age Group.

Den e edad di 11-12 anja nos ta haya e atletanan Dayna Leer, Montserrat Willems, Wyndel Beyde y Gian Giel, mientras den e categoria di edad 13-14 anja nos tin e atletanan Eljoenai Wehl, Jo-Nina Kock, Lyon Harms y Samuel Vrolijk.

Como hefe di delegacion encarga cu e seleccion nos tin Safiera Schippers mientras e coachesnan lo ta Richard y Moraima Luydens. Read more

IBISA CU CAMINATA DEN NATURALEZA


ORANJESTAD (AAN)- Den luna di vakantie, IBiSA ta organisando un programa variabel cu actividad pa un bida activo y tambe con pa cushina saludabel, dirigi specialmente na e hobennan.

E prome evento ta e caminata cu ta tuma luga den Parke Nacional Arikok dia 20 di juli proximo. Lo cobra un suma chiquito pa cubri e desayuno pa e hobennan participando.

E trayecto ta di aproximadamente 1 ora y na final di e caminata nan ta haya un desayuno y algun tips di alimentacion balansa y saludabel.

E “Nature Walk and Breakfast” ta sali pa 7’or di mainta for di entrada principal di Parke Nacional Arikok na San Fuego y e ruta ta den Cunucu Arikok unda por bay mira cas di Torto, dibuho di indjan y matanan cu sa wordo uza como remedi di tera y hopi mas.

E caminata aki ta den man di e “parkrangers” di Parke Nacional Arikok unda nan lo guia y splica esnan participando e balor cu nos naturalesa tin pa nos como hende y eco sistema di e isla.

E actividad di fin di siman ta 1 di 3 actividad prepara pa e lunanan di Juli y Augustus. IBiSA su seccion di salud ta organisa y promove e actividadnan pa hobennan di 12 aña pa 17 aña. Read more

ATLETA J-RICK MADURO A COMPETI DEN E NACAC U18 CHAMPIONSHIP 2019 NA QUERETARO, MEXICO


ORANJESTAD (AAN) – Recientemente e hoben atleta di coremento, J-rick Maduro di 16 aña a competi den e campeonato di atletismo organisa pa e (NACAC). J-rick a competi den e categoria U18, unda e hoben atleta di coremento a competi den e 1500m y 3000m. Mester bisa cu J-rick a logra un di 7 lugar den e 1500m y un di 5 lugar den e 3000m, cual ta un bon prestacion. Hunto cu J-Rick a biaha coach Kenneth Lucas.

Stichting Sportsubsidie Aruba ta contento di por aporta y brinda e ayudo na e federacion di atletismo, AFF pa asina nan atleta J-rick Maduro por a competi den e NACAC U18 Championship na Queretaro, Mexico.

  Read more

ATLETA SHAWNEY COENAARD Y COACH MERLE NEDD LO FORMA PARTI DI UN CAMPO DI ENTRENAMENTO Y COMPETENCIA NA COSTA RICA


ORANJESTAD (AAN)- Recientemente e atleta prospecto den e deporte di atletismo, Shawney Coenraad hunto cu coach di atletismo Merle Nedd a biaba pa e ciudad di San Jose, Cosa Rica unda nan lo atende un campo di entrenamento cu a wordo organisa pa e confederacion di atletismo den Central America y Caribe esta NACAC.

Na e curso diferente orador di nivel mundial manera entre otro e medayista y legendario Carl Lewis a duna charla riba diferente ramo di e deporte madre di Olimpismo.

E campo ta di 9 Juli te 17 Juli mientras 18 pa 21 di Juli, Shawney lo competi den e Panam Championship 2019 na Costa Rica. Un total di 600 atleta a registra pa e Camp y e competencia aki.

Stichting Sportsubsidie Aruba ta contento di por aporta y brinda e ayudo na e federacion di atletismo, AAF pa asina nan por atende un campo di entrenamento y e Panam Championship di NACAC na Costa Rica.

  Read more

PROCESO DI RFP PA ARUBA SU ‘WASTE TO ENERGY PLANT’ TA YEGA SU DEADLINE


Minister di Desaroyo Teritorial, Infrastructura y Medio Ambiente Otmar Oduber

ORANJESTAD (AAN): Gobierno di Aruba tin mas o menos 1 aña y mey desde  (december 2017) cu a cuminsa cu e proceso pa por atende cu henter e problematica di maneho di desperdicio cu tin aki na Aruba.

Minister di Desaroyo Teritorial, Infrastructura y Medio Ambiente Otmar Oduber a expresa den su rueda di prensa mas recien  cu esaki ta prome biaha den historia cu a pone un ‘werkgroep’ hunto cu tabata consisti di diferente departamento di Gobierno, sindicato, werkgevers organisaties y otro expertonan manera PAHO, pa contribui na e proceso pa yega na e mihor solucion.

Proceso

Aña pasa na comienso di aña a cuminsa cu e proceso di un RFI cu a conduci na e RFP nan, e destaho publiconan cu ta tumando luga na e momentonan aki. Manera ta conoci recientemente dos di e destaho publiconan aki a tuma lugar.

Uno, pa e remedicacion y proposicion nobo pa Parkietenbos, caminda cu tabatin un compania local cu a participa y tambe e di dos destaho publico cu ta pa loke ta trata e ‘sanitary landfill’ y loke ta bira e dump nobo, cu lo tin un concepto nobo di acuerdo cu normanan internacional. Pa esaki tambe tabatin un compania cu a participa cu ta encera dos compania local.

Diahuebs  18 di juli e tercer destaho publico lo tuma luga cu tin mas ‘wowo’ riba dje pa loke ta e proceso di ‘waste to energy’ a traves di un planta di incinerator.

Minister Oduber a splica cu tin diferente peticion cu a drenta particularmente den e ultimo dos simannan pa loke ta trata peticion pa tempo adicional pa gruponan por participa.

Gobierno y e comision ta den evaluacion di esaki pa cual lo participa esaki unabes cu tuma un decision. Pa conclui Minister Oduber a enfatisa cu locual cu kier logra ta pa tin mas participacion cu ta posibel, mas oferta y cu Gobierno di Aruba por haya e mihor oferta, y esun di mas adecua pa por evalua riba dje.

  Read more

AWE 60 AÑA PASA, E PROME HOTEL DI PISO ARUBA CARIBBEAN HOTEL A WORDO INAUGURA


Dia 18 di juli 1959, e prome hotel di piso, Aruba Caribbean Hotel a wordo oficialmente inaugura. Esey kier meen cu awe, dia 18 di Juli 2019, ta exactamente 60 aña pasa cu Juancho Irausquin, Oscar Henriquez a dicidi pa bin y engrandece nos turismo aki na Aruba. Un tremendo vision di dos politico cu a inicia cu e era nobo den turismo di nos isla.

Despues di e di dos guera mundial, Lago su refineria cu tabata suministra gasolin di 100 octano, cu e tempo ey tabatin 8000 empleado ta traha, a dicidi di bin cu un reduccion di su empleadonan causando un desempleo masal. E tempo ey e pilar economico No. 1.

Na aña 1955 e Partido politico, Partido Patriotico Arubano (PPA), un partido cu Juancho Irausquin y Oscar Henriquez a lanta, a gana eleccion di Gobierno Central na Corsou y eleccion di Eilandsraad di Aruba. Esaki a pone Lider di e partido, Sr. Irausquin hunto cu Oscar Henriquez (Diputado di Turismo) den un posicion pa busca di engrandece e fundeshi economico di Aruba. Aruba su beachnan blanco, un clima agradabel y su hendenan amical y hospitalario lo por hacie perfecto pa turismo. Mesora el a cuminsa expande Aruba su infrastructura, particularmente, entre otro, awa y coriente asisti pa su Diputado di Financia y Turismo, Sr. Oscar Henriquez di 29 aña, y Ernesto Petronia di Departamento Obras Publico y Educacion.

Irausquin y Henriquez a convence Gobierno Hulandes pa financia e planta di awa y electricidad na un costo di 20 miyon dollar. E tempo ey nos tabatin e Coral Strand Hotel traha na 1943 pa Sr. Chariban Neme, un emigrante Lebanon kende tambe a tuma e iniciativa di traha Basi Ruti Hotel na 1954.

Na 1955 Irausquin y su ekipo a cuminsa traha camindanan pa haci e beachnan mas acesibel. Un caminda pega cu lama habriendo e parti west di nos isla a wordo traha for di e stacion di gasolin na Playa te na unda e hotel Holiday Inn a wordo traha despues, un caminda cu a haya su nomber despues. Pero cu e plan pa e siguiente aña haci’e mas grandi, esta for di Eagle Beach pa Malmok. Henter e proyecto lo a costa Fls.1,100,000.00.

Esaki lo a permiti tambe pa habri e cercania pa publico. Departamento di Obras Publico a proyecta e boulevard y a supervisa su construcccion. Ora e ta cla, e lo ta siete miya asfalta cu dos avenida y acero di concreto. E punto zuid lo conecta cu L.G. Smith Boulevard na Playa. E punto nort lo topa cu e caminda di Noord.

Entre e dos puntonan aki lo a conecta cu camindanan for di Eagle Beach, Bubali, Palm Beach, y Basi Ruti. En total tur esaki lo a tuma 85000 yarda cubico di tera, 7000 cubico di asfalt, un mexcla di piedra garna y 1300 pia cubico di concreto. E boulevard a wordo proponi door di e bestuurscollege anterior y a wordo paga for di belasting. E boulevard a haya tur e lusnan necesario y e maximo velocidad riba caminda tabata 60KM pa ora.

Sr. Irausquin su vision tabata pa e caminda (boulevard) aki sirbi pa sigui traha hotelnan luhoso cu por sigui contrbui na nos desaroyo economico sigur. E prome di e hotelnan aki cu a resulta tabata Aruba Caribbean Hotel di 125 camber pero cu despues lo bira 400 kamber. Sr. Morris Lapides, un architecto a diseña e hotel. Dia 18 di juli 1959, na e inauguracion oficial, Sr. Morris de Woskin, Executive House President, a bisa: “Aruba lo no ta mescos mas” y e tabatin tur rason.

E facilidadnan di e beach di e hotel mester a percura pa 100 turista crusero cu tabata yega Aruba tur Diahuebs. Irausquin y Henriquez a busca shareholders for di Venezuela, no solamente pa motibo di inversion, pero tambe crea interes pa Aruba su turismo. Nan a haya 100 shareholders y bou di direccion di e abogado Venezolano, Dr. Philip Malten e compania VenAruba a wordo funda, cu despues a cambia otro nomber.

Ta un lastima pa bisa  Sr. Oscar Henriquez, un politico, siendo Diputado di Turismo, cu a traha asina duro man cu man hunto cu Juancho Irausquin pa nos turismo cu awe un bes mas e ta nos pilar economico No. 1 no por a haya su nomber riba e boulevard aki. El a ocupa funcionnan masha importante den desaroyo di nos pais, pa menciona algun, politico, diputado, gezaghebber, oficier in de Orde van Oranje Nassau, presidente di algun organisacion, etc. di nos pais, mucho hopi pa menciona. Mi opinion.

Pabien na tur esnan, cu di un manera of otro, a contribui pa lanta turismo aki na Aruba.

Un danki na Sr. Dufi Kock Escritor y Historiado pa e articulo y potretnan. Read more

NOS COMUNIDAD TA DEN CRISIS, DIA PA DIA NOS HENDENAN TA BIRA MAS POBER


Mervin Wyatt-Ras: 

ORANJESTAD (AAN): Un di e retonan di mas grandi cu mundo ta enfrenta actualmente ta esun climatologico y tambe pobreza y hamber. Esakinan ta parti di e SDG’s cu gobiernonan mundialmente a pone den nan metanan pa logra. Nos a papia di nan durante reunionnan di Ipko na Den Haag pa traha hunto.

Sin embargo si bo wak e situacion na Aruba e ta lamentable. Door di tur e medidanan nos hendenan tin menos placa den nan cartera y por pone menos pan ariba mesa pa nan famia.

Bo ta drenta un supermercado of riba caya of ora bo bishita hende, tur caminda tin e comentario cu nos hendenan no por sobrevivi cu locual nan tin como salario. E salarionan ta keda mescos sin embargo e gastonan pa compra di cuminda, paña y otro articulonan a bira mas halto.

Tur cos a subi y e prijsnan di comestibles y tambe di berdura y fruta a bira hopi mas halto. A tuma nota di un mensahe den cual ta menciona cu prijs di mango a bira casi 6 florin y prijs di awacati a bira 9 florin of mas. Cosnan asina ey ta basico cu nos mester papia di nan.

Nos mester vigila gobierno pa e por haci su trabou debidamente. Nos ta haya nos mes confronta cu tur subida di prijs, BBO cu a subi te 6 % cu a afecta nos pueblo. Tambe e reforma fiscal tin su impacto grandi. CBS ta indica cu e poder di compra di nos hendenan a baha.

Awor despues cu a pasa e ley di reforma fiscal nos hendenan no por ni wak riba recibo e suma di BBO cu mester paga. Nos ciudadanonan no por ni check y pues controla kico ta den canasta basico y kico no. Productonan den canasta basico mester tin un prijs fiho mientras e otro productonan nan prijs por fluctua. Segun e minister ora no pone BBO riba recibo esey lo trece mas transparencia, locual no ta berdad. Esaki no ta transparente.

Nos hendenan ta pasando den un situacion dificil contrario na loke gobierno di AVP a haci durante su gobernacion. A duna e.o. reparatietoeslag, a hisa salario minimo, a hisa bijstand, a duna schoolkinderentoeslag, tabatin aumento di pensioen, inhaalmanouvre, indexering na ambtenaarnan, gelijkbedrag, reduccion di studielening pa studiantenan, reduccion di prijs di awa cu 35% y di coriente cu 15%.

Contrario na gobernacion di AVP awor aki nos hendenan solamente wordo azota cu medidanan y prijsnan cu ta subi. Pa colmo nos tin cu bisa cu Parlamento a keda sin sostene e ley di LAFt manera e tabata dor di cual e poder di gobierno y di Hulanda a bira mas grandi. Gobierno a firma un protocol cu Hulanda sin consulta cu Parlamento dor di cual tin diferente medidanan ainda na caminda pa nos pueblo.

Pesey mes awor gobierno ta den e situacion unda cu Hulanda no ta acepta esaki. Awor ora bo tende gobierno papia ta comosifuera cu ta gobierno di AVP a ocasiona esaki. Si pueblo ta corda ta nan ta esunnan cu a bay parti rapportnan tur caminda na Hulanda pa CAFt bin Aruba. Nan a propaganda esaki y awor nan mes tin cu bay para duro. No bin tira culpa ariba otro hende mientras ta bo mes a ocasiona esaki.

Si wak e desigualdad economico cu tin den nos pueblo, por bisa cu e falta di poder di compra tin su efecto social. Por papia pues di desigualdad social.

Nos hendenan aunke esnan cu tin  trabou nan no por a kom rond awor, e gastonan ta mas halto cu salario. Nan no por hiba nan yiunan bay un cine den weekend, no por hiba nan yiunan bay come, haci cosnan pa diverti of relaha man mes of cu e famia. Esaki sigur ta afecta relacionnan familiar.

Nos mester ta conciente di e impacto social.  Awor aki nos comunidad ta den crisis. Pesey tambe por nota cu hasta comerciantenan y diferente empleadonan cu ta trahando den diferente sector ta uniendo pa mustra e gobierno aki cu esaki no por.

Tin cu pone un paro na e situacion aki sino e situacion aki lo ocasiona un pobresa grandi di nos hendenan. Gobierno por tin bunita plannan riba papel cu kier logra p.e. e SDG’s y e diferente ministernan por ta bula mundo rond gastando placa di pueblo pa asina ganja mundo cu nan ta traha na bienestar di Aruba mientras realidad ta cu pueblo ta pasando den malo.

  Read more

PARLAMENTARIO SHAILINY TROMP-LEE A BISHITA NA DEPARTAMENTO DI LABOR Y INVESTIGACION


ORANJESTAD (AAN): Parlamentario Shailiny Tromp-Lee (MEP) di bishita na Departamento di Labor y Investigacion, pa trata e area di inspeccion, caminda a keda palabra cu lo yuda e departamento cu cambionan di ley necesario.

Parlamentario Shailiny Tromp-Lee conhuntamente cu algun colega di Fraccion di MEP a bishita Departamento di Labor y Investigacion pa trata e area di inspeccion. Ta necesario y sumamente importante pa Aruba tin un seccion di inspeccion cu ta traha dirigi y ta funciona optimalmente.

Mas y mas como representante di pueblo bo ta keda acerca en conexion cu conflicto of problema cu nos hendenan tin na pia di trabou. Hopi biaha e cultura di miedo cu ta reina pa basta aña caba, ta haci cu nos hendenan no ta bay Departamento di Labor y Investigacion pa conseho of pa entrega keho. Miedo pa keda persigui na trabou of keda kita for di trabou ta hunga un rol hopi grandi. E situacion aki sigur ta haci e necesidad di inspeccion di parti Departamento di Labor y Investigacion mas grandi ainda.

Actualmente e seccion di Inspeccion conoce diferente reto. Esaki sigur a keda atendi durante e reunion di awe mainta. Pa menciona algun: percura pa tur inspector haya nan ‘toezichthoudende rechten’, e seccion conoce un absentismo pa motibo di enfermedad di 37,5% cu ta un preocupacion, baloracion maximo di e funcion di inspector di labor ta den discusion y por ultimo tin necesidad pa adapta cierto ley cu ta obstaculisa ehecucion di nan trabou. Ariba e delaster punto menciona parlamento por aporta y esaki sigur a keda palabra cu Departamento di Labor y Investigacion.

Parlamentario Tromp-Lee a palabra cu Departamento di Labor y Investigacion cu hunto lo bay percura pa prepara e cambionan necesario y cu Fraccion di MEP mediante su persona lo presenta esaki na Presidente di Parlamento pa e por encamina su proceso. Alabes ya a tuma contacto cu Minister di Labor pa trata e resto di puntonan menciona.

Un cambio di ley necesario cu a keda trata, tin di haber cu e Ley Bestuurlijke Handhaving Arbeidswetgeving cu a keda aproba na aña 2013. E ley aki ta encera entre otro e posibilidad pa inspectornan por duna boet ora cu tin infraccion ta keda constata y cu e doño di trabou no ta percura pa corigi esaki den un tempo indica. Despues cu e ley aki a keda aproba Departamento di Labor y Investigacion a encamina un proceso basta largo y extenso pa por a formula e ‘handhavingsbeleid’ pa cu ehecucion di e ley aki.

E ‘handhavingsbeleid’ a keda presenta na Gobierno di AVP pero e no a keda aproba y tampoco nan a duna feedback al respecto. Asina cu Minister Glenbert Croes a sinta como Minister di Labor esaki a keda presenta na su persona y aña pasa el a presenta esaki na Conseho di Minister cu a aproba e maneho cu algun puntonan di cambio. Esakinan a tuma lugar y dentro di poco por sigui cu implementacion di e ley. Pero ya caba Departamento di Labor y Investigacion ta indica cu un cambio den e ley ta necesario pa por garantisa cu e inspeccionnan por ta efectivo. Read more

MAS CU 20 TRAHADOR DI WARDA NOS COSTA A HALA ATRAS Y A DISTANCIA DI E PROME CARTA PA MINISTER


Diego de Cuba presidente di STA a splica:

ORANJESTAD (AAN) – Den entrevista cu DIARIO, e presidente di Sindicato di Trahadornan di Aruba (STA) sr. Diego de Cuba, a menciona cu el a tuma di e carta cu un grupito di trahador di Warda Nos Costa a skirbi y manda pa Minister.

De Cuba a indica cu STA tin un grupo grandi trahadornan di WNC cu e ta representa. STA a compronde for di e grupo aki ta cu e carta cu a bay pa e minister tin hopi firma cu a wordo uza, y cu loke nan tin entendi ta cu e carta no ta cuadra cu locual a splica nan y incluso nan no tabata di acuerdo.

Despues cu nan a wak tur loke a sali publica den prensa nan a yama sr. De Cuba y riba nan mes a traha un carta cu nan a firma, y mande pa Minister den cual nan ta distancia di loke a wordo skirbi anteriormente.

Den e prome carta nan a papia di mas di 40 firma, pero den e ultimo carta aki mas cu 20 persona a hala atras.

Diego de Cuba a expresa cu e cosnan aki no ta saludable pa continua, pa un departamento asina importante.

E sindicalista a indica cu STA por compronde por tin hende cu no ta di acuerdo cu e maneho di e directora, pero mester ta conciente tambe cu un departamento manera WNC mester di hopi disciplina.

Diego de Cuba ta referi na un disciplina casi infalible. E trahador mester ta intachable y integra. E trabao eherce aki ta rekeri di hopi responsabilidad.

E lider sindical a subraya cu STA ta ripara cu tin hende cu no por cu e presion cu ta bin for di ariba pa cumpli cu cierto disciplina. El a señala cu locual ta di lamenta tambe cu e sindicato no tin problema pa reuni cu ningun director y e tabata tin varios reunion cu e directora di WNC, pasobra mester scucha di dje cual ta su plan di maneho.

“Nos sa cu no ta un hende facil, locual tur hende sa. E ta hopi streng y nos ta kere cu eynan e problema ta bin. Mi ta kere cu un reunion di parti di e minister cu tur e trahadornan, habri y si ningun sindicato cerca unda e por scucha kico précis ta pasando”, e lider sindical di STA a expresa.

El a subraya cu si un trahador tin problema cu e maneho, e mester papia cu e directora prome, riba tur e problemanan cu tin, pero no salta su autoridad, anto bay direct na e minister.

Y si no por resolve e situacion di ningun manera cu e directora, anto acerca e minister. Pero no cu no ta sinta cune pero ta core bay minister di biaha. “Cu e sistema aki nos di sindicato STA ta traha. Si mi ta reuni cu e director di cualkier instancia pero mi ta ripara cu mi no ta sali afo, mi no ta dal cada bez contra muraya pero e ora ey si mi ta acerca e minister”, de Cuba a reitera.

E ora ey e trahador a construi motibonan pa acerca e minister, segun e sindicalista.

No obstante, segun e trahadornan cu no ta contento e problema no ta di maneho sino di trato y actitud di e hefe, por ehemplo ora di otorga vacacion cu e ta laga un grupo tuma vacacion mientras otro no.

De Cuba dilanti un pregunta al respecto a expresa cu den e caso aki mester traha un plan di vacacion unda cada trahador mustra ki fecha e kier bay cu vacacion pa e hefe evalua esaki, mirando cu podise cu mas di un trahador ta pidi vacacion den e mesun periodo.

Pesey e mester traha un plan di vacacion. De Cuba no sa si WNC tin esaki of no, pero cu un plan di vacacion por traha hopi mihor. En todo caso, den e reunionnan cu STA tabata tin cu e directora y e delegacionnan el a duna oido na tur e puntonan treci dilanti y ta straña de Cuba cu pa e asunto di vacacion e no tin oido. Read more