CURACAO CORONAVIRUS (COVID-19) NEWS AND UPDATES

Covid-19 public announcements Curacao

 

 

 

Den gara di Corona virus (COVID-19)

Felix D. Pinedo MSc in Healthcare / Nursing Den tempu relativamente kòrtiku, despues di a ataká diferente paísnan na mundu nos tambe a konose e prome kasonan di hendenan ku a ser kontamina ku Corona-viro. Aunke nos ta bisa ku ta 2 òf 3 kaso, hecho ta ku pa un isla chiki manera Kòrsou, komparabel ku paísnan hopi mas grandi e ta hopi. Mi ta kere ku dòkter Izzy Gerstenbluth a hasi un bon trabou huntu ku su tim. Nan a kuminsa tuma sierto medidanan delantá. Tempu di e malesa SARS-1 okashoná pa e otro tipo di Corona virus, nos no a ser afektá. Por bisa ku tur e kasonan ku nos konose a ser importa for di eksterior. Nos tin hopi hende lokal ku ta bai e diferente paísnan kaminda e viro aki ya ta presente. Mi mes ta kere ku e rapides ku e viro aki ta ser plamá (pasó ta hende ta plamé), a sorpresa hasta sientifikonan. Esei ke men ku e viro aki ta hopi virulento pues su forsa di atake i reprodukshon ta hopi haltu. Esakinan ta hustamente algun karakteristika ku ta hasi un viro peligroso. Tambe e manera ku e viro por ser plamá.

Universidat Johns Hopkins ta tene un mapa ku ‘realtime data’ di e kantidat di pashèntnan diagnostiká ku e coronavirus nobo jama Covid-19. Tambe nan ta registra e cifranan di e kantidad di pashèntnan ku a fayese i esnan ku a rekupera di e virus corona di Covid-19. E sifranan aki ta basá riba informashon risibí di World Health Organization (WHO) anto ECDC (European Centre for Disease Prevention and Control) . Tene kuenta ku por tin diferensia(nan) chiki den e sifranan mustrá riba e mapa kompará ku sifranan aktual. Pa e ultimo datonan por akudi na e website di WHO i ECDC.


Bron: Johns Hopkins University. Mapa original (grandi). Klik aki pa mapa riba mobile

E distribushon di un viro via aire ta esun ku na mi opinion ta plama mas lihe. Den kaso di SARS-1 esaki a kousa kasi mesun hilaridat rònt mundu. Pa motibunan manera ya menshona e Corona-viro di Covid-19 a plama masha lihe rònt mundu te yega aki kontrali na e viro di SARS-1. Ni e ‘flesh eating bacteria’, ni Ebola a kousa asina tantu hilaridat rònt mundu. Nos a konose situashonnan manera, Guilen Barré i Polio ku mester ser isolá den Sehos. Manera e situashonnan ei a surgi nan a bai bèk. Laga nos spera ku e viro no kuminsa plama bou di poblashon. E ora ei e kos ta bira ferfelu. Pa e motibu aki ta hopi importante pa e tim di dòkter Gerstenbluth por ‘trace’ mas lihe posibel tur esnan ku tabatin kontakto ku e esnan ku ta kontamina. Si e pueblo mes no kopera i kumpli ku e normanan di higiena manera ta ser propagá e viro por ser plamá den komunidat fasilmente. Dòkter Izzy tal bes no ta di akuerdo ku mi, pero e asuntu aki ta unu dje peligroso ku mi ta bisa ku nos mester konsidera tur hende un potensial fuente di e viro. Meskos ku tempu ku e HIV-AIDS-virus a surgi. Ku esaki mi ke pone e punto di kargadonan (‘dragers’) na ordu. Esei ke men ku bo ta kargado di e viro sin sa i bo ta pasé pa otro. Pa esnan ku ta konosí ku historia di e mundu mediko, nan mester sa di e historia di Typhoid Mary ku tabata kargadó di e mikro-organisma ku ta kousa thyphus. Hopi hende a muri na Merka dor ku nan no tabata sa e fuente infekshon. Dios laga nos no kai den un situashon asina. Centers for Disease Control (CDC) na Merka semper ta move hopi lihe pa haña e fuente di infekshon i kontaktonan ku tabatin, pa kontene e plamamentu. Esaki nos por a mira tempu ku tabatin diferente ‘outbreak’ di entre otro salmonella.Ta pesei mi ta bisa ku e investigashon di Gerstenbluth su tim ta hopi importante pa blòkea plamamentu di e viro. Ta pesei tambe tin ‘shutdown’ na diferente país, pa no yega na e nivel di e ‘Spanish Flue’. Un viro ku ta ser plama via aire ta esun mas difisil pa kombatí. E ‘Spanish Flue’ asina ei a mata miyones di hende. Mi a mustra ariba ku tal bes nos tin di bai den direkshon di tempu di kuminsamentu di e viro HIV(Aids). E tempu ei e protokòl mundialmente tabata i ta te ahinda ku mester konsidera tur hende komo potensial kargadó di e viro HIV. Esaki ta un akto importante pa evita ku e viro Corona di Covid-19 ta plama bou di nos hendenan lokal. ‘Socially distancing’ ta un tipo di akto asina, pero den praktika e ta bai difisil.

Author: Felix D. Pinedo MSc in Healthcare / Nursing

Pa datonan up-to-date for di Hulanda por bai na e dashboard riba e website di Rijksoverheid.